Bahiyya Book One Complete Hausa Novel

“Lallai Mama da ciwo sosai a cikin rayuwar ki, wannan labarin da ban al'ajabi ya ke, Don bare yayi maka abu ba zai zama da ciwo sosai ba kamar ɗan uwanka, yanzu ta dalilin laifin babanmu shi ne ya shafe ki kema kika rasa dangin ki ba gaira ba dalili, kiyi haƙuri Mama, Wallahi Allah baya zalunci kuma baya yafe haƙƙin wani akan wani, kuma addu'ar wanda aka zalunta bata da wani shamaki tsakanin ta da ubangijin mu, na san cewa kun daɗe kuna addu'a akan wannan zaluncin da suka muku kuma muma daga yau zamu ɗora, matuƙar bamu da haƙƙin su suka yi mana wannan aika aikar to muna addu'a Allah ya bi mana haƙƙinmu a inda ba su da wani tsimi ba su da dabara”

Nuhaira ce tace.

“To Mama shi Yah Ishaq ɗin kenan ya samu zuwa Nijar ɗin kafin ya rasu??”

Gyaɗa kanta tayi tace.

“Eh! Tun zuwan da muka yi yana zanen goyo, bamu samu komawa ba har ya rasu”

Ajiyar zuciya na sauke ina ƙara jinjina girman wannan al'amari a raina na sake kallon Mama nace.

“Mama mutanen nan sun aikata kuskure, kuskure babba domin raba iyaye da ɗansu baban zunubi ne, saboda tsabar rashin imani Mama suka raba ki da duk dangin ki babu tausayar suyi tunani cewa ke fa mace ce, zuciyar ki ba zata iya jurewa ba”

Daga haka sautin kukan ta ya ƙaru sosai da ƙyar muka samu ni da Nuhaira muka rarrashe ta ta samu bawa zuciyar ta magana.

Daga haka kowa ya miƙe ya tafi wurin nasa yayin da zuciyoyinmu suka cika da rauni da damuwa.

Da dare cikin gabatar da sallar Isha, Ikram ta shigo tana mai ƙwala kiran sunana, Nuhaira ce ta tare ta tana tambayarta ya a kayi, Ina ji tace wai Maman su ce take Kirana cewa da Malama. Bayan na idar naje na sanar wa Mama na tafi.

Ina shi ga muka gaisa da Ita na samu wuri na zauna tare da rungume autar Fahaira nace.

"Gani Malama”

Tattaro nutsuwar ta tayi ta Kalleni da kyau tace.

" Bahiyya kyaun alƙawari cikawa, kuma da ilminki yadda kuka yarjejeniya da Hajiyah Hanifah ya kamata ki cika, ta kira doctor Sam ya kirani tace tana buƙatar zuwa UK ganin likita domin jikin ta ya matsa mata kuma tare take so ku wuce kamar yadda kuka alƙawaltama juna”

Gyaɗa kai nayi cikin gamsuwa da maganar ta nace.

"Haka ne malama, kyaun alƙawari cikawa. Daman can ba mantawa nayi ba, taya zan manta Malama? Matar da ta dalilin ta ne muka tsinci kanmu da sake darawa a rayuwa, ko kaɗan bana dana sani, wasu ma da ake ɗauka aikatau tun daga garin su zuwa wata uwa duniya na tsawon shekaru suyi ta wahala dare da rana ballanta kai da aikin bai taka kara ya karya ba kuma shekara ɗaya kacal. Kawai dai Mama ta nike tunani har yanzu ban iya faɗamata ba, kullum cikin zullumi nike.....”

Cike da ƙwarin guiwa tace.

“No kar ki damu in sha Allah zan yi mata bayani kuma zata fahimta da yardar Allah, ke dai abinda nike so da ke shine ki tsaya matsayin ki da Allah ya ajiye ki, ki ki ye yi kanki ki kuma  zama mai wadatar zuci da godiya da duk abinda aka miki, ki riƙe ibada Bahiyya, mutanen nan sai a hankali, wasu wallahi ko ibada bata dame su ba, saboda haka kada kije ki samu canjin wuri ki ce zaki canja ɗabi'arki”

Gyaɗa kai na nayi na ce.

"in sha Allah zaki same ni mai kiyaye. Roƙona shine kuci gaba da kulamin da Mama da Nuhaira, sannan wannan kuɗin ku yanke shawara a tsakanin ku wace kasuwa za'a yi da su, ni bani da ja da hakan, Allah ya yi mana jagora”

Daga haka na miƙe tare da yi mata sai da safe na shige gida.

Bayan kwana biyu da maganar mu da malama, sai ga mama da kanta ta kirani ɗaki tace min.

“Bahiyya naji komai daga bakin Malama, ba abinda zance sai dai ince Allah ya kiyaye ki a duk in da kike, amma ba don abun yayi min daɗi a rai ba, to amma wani lokacin muna kan so abu ya zama ba alheri ba ne garemu, wani lokacin kuma sai muƙi abu ya zama shine mafi alheri a gare mu. Tace min gobe ne zaku tafi”

Cikin faɗuwar gaba na ce.

“Gobe kuma Mama??”

“Eh, tace matar tace ba tada lafiya kuma likitan na ta a can yake”

Cike da Murmushi Nuhaira ta kalle ni tace.

“Aunty Bahiyya kin ji daɗin ki ke kam, kina baƙin cikin baki je Nijar ba gashi yau Allah yayi zaki je garin da yaci uban Nijar ɗin, wani hanin ga Allah bai wa”

Ɗan guntun murmushi na saki tare da girgiza kai na nace.

“Nuhaira ba zan biye miki ba, domin ke har yanzu tunani bai gama shigar ki, in ba shi taya zaki haɗa tafiyar zumunci ta jini da wannan tafiyar da babu haɗin iya babu na Baba...”

Tare numfashi na tayi tace.

“Ni dai ba ruwa na, UK tafi Nijar, kuma dan Allah ki yo min tsaraba Aunty Bahiyya ki sawomin kayan kanti irin riga da wandon nan da naga matar nan ta saka ranar, wallahi ni dai ta burgeni ainun”

Ni dai jinta kawai nike domin can ƙasan zuciyata wani abu ni ke ji yana yimin ba daidai ba.

Washe gari ko har ƙofar gida wata haɗaɗɗar mota tazo tayi parking wanda kallo ɗaya zaka yi mata ka tabbatar cewa ba daga ƙaramin gida ta fito ba. Tsayuwar Motar da zatayi sanadin canja alƙiblar tafiya ta a idon 'ƴan unguwar mu zuwa sayar da jikina domin karuwanci na biyawa Mama na kuɗin aikin lalurar ta bayan sun san bamu da wannan kuɗin bamu da dalilin su.

Kuka na ke sosai tare da riƙiƙƙe Mama tamkar raina zai fita, yayin da Malama da sauran' ƴan uwa da masu da zuciya ɗaya da masu yi don munafurci suka tsaya suna ta bamu baki, suna neman jin tushen maganar ina zanje. Wanda har suka ƙaraci gulmar su suka gama babu wanda yace musu ga inda zani.

Har na shiga motar sai kuma na fito da gudu na zo jikin mama na ƙara fashewa da kuka ina faɗin.

“Mama dan Allah dan girman Allah Mama ki tsare shan maganin ki a kan lokaci akan kuma ƙa'ida, duk sanda kika ji matsala Nuhaira ta rakaki asibiti mama, kuma ki yimin alƙawarin cewa ba zaki sake shiga wata damuwa ba har abada, ko da ace bamu da kowa mu uku Mama mun wadaci kanmu, a haka muna farin ciki sosai, ki kula da Nuhaira Mama.....”

Daga nan kuma na juyo ga Nuhaira na rungume ta nace.

“Ke ƙanwata marar jin magana da baccin safen da bana so dan Allah ki kula da kanki sosai, ki kula da Mama kinji ko, nayi miki alƙawarin zan saya miki duk abinda kika ce kina so, kamar gobe ne zaku ga na dawo, in sha Allahu”

Daga haka na wuce direct na shige motar ina ta ɗaga musu hannu tamkar wata ƙaramar yarinya har suka ɓacewa gani na.

Bayan mun fito kan Titi malama ta hau ƙara yi min nasiha saboda tare muke ita zata rakani zuwa gidan Hanifah domin su ƙara tabbatarwa cewa a hannu nagari nike.

Nan na roƙe ta cewa dan Allah mu fara bi ta gidan Maman Khadijat in ƙara yi mata godiya kafin na tafi, sai gashi ko munyi nasarar zuwa gidan amma bata nan kamar yadda masu gadi suka shaida mana. Daga nan drivern ya fito ya juya akalar mota zuwa gidan Hanifah.

Tun daga farkon unguwar na fara kalle Kalle domin wannan ba kamar sauran unguwanni ba ce, duk yadda nike ganin unguwar su Maman Khadijat da mugun kyau wannan unguwar ta cuna mata, tamkar ba'a Najeriya ka ke ba, Gate ne gasu nan kala kala, idan mun wuce wannan mu kai ga wannan, ga kaki nan kala da kala duk a matsayin masu gadi.

Ban ƙara tsinkewa da al'amarin ba sai da muka shiga cikin tamfatsetsen gidan kacokam na ƙara tabbatarwa kai na da cewa Lallai yau ni Bahiyya zan shiga wata duniya ta daban.

Kallon malama nayi kamar yadda itama naga take kallo na tare da yimin alama cewa mu fita.

Jiki na take ya hau karkarwa tamkar ana kiɗamin mazari ta dalilin tozali da nayi da wasu shirga shirgan samudawa waɗanda babu alamun wasa a tare da su sun ƙaƙƙame tamkar wasu sandararrun gunku na................

                             *OUM AMEER*

💝 *BAHIYYA*💝

*ADABI WRITERS ASSOCIATION*

               *BY*

*AMINA IBRAHIM*

  *(OUM-AMIR)*

*BAHIYYA NOVEL ƊIN KUƊI NE KIBIYA 500 TA WANNAN ASUSUN 3132703269 FIRST BANK AMINA IBRAHIM SAI KI TURA SHAIDAR BIYA TA WANNAN LAYIN 08068974831*

*FREE PAGE*

     *BABI NA GOMA SHA UKU*

........... Wani ƙayataccen falour ne na alfarma akayi mana masauki muka zauna, ni dai ko a nan a darare ni ke zaune, Malama ce ma naga ta saki jiki sai aikin kalle kalle take.

Jiga jigan hotuna ne kala da kala ita dai Matar gidan kallo daya nayi mata a wani hoton na gane ta, sai dai hotunan maza ne biyu na gani ba zance ga mai gidan ba.

Bayan malama ta gama ƙare musu kallo ta kalle ni cikin mamaki tace.

“Bahiyyah kin san nan ko gidan waye?”

Girgiza kai na kawai nayi alamar ban sani ba.

Gyaɗa kai tayi tana mai ƙara jinjina girman al'amarin tace.

“Daman farkon tozali na da ita raina ya bani cewa kamar ita sai dai girma da matsayi irin wanda take da shi shine ya hana zuciya ta amincewa da cewa ita ce, to ashe ita ɗin ce. Babbar 'ƴar kasuwa ce, ita ce mammallakiyar Ɗan-Ali Decor and Event wanda ake ji da shi a faɗin ƙasar nan wanda bata jima da sake buɗe reshenta a United Arab Emirate ba,Mahaifinta shahararre ne kuma sananne yanzu haka Ambassador ne a ƙasar Cairo , mijinta kuma Umar Farooq mai gishiri shima shahararre ne kuma sannan ne a faɗin waje da kewaye Bahiyya,shi jika ne ɗaya tilo ga Madinat shahararriyar mai kamfanin Almadinah textile and more da ke da rassa daban daban a faɗin ƙasar nan da kewaye....”

Ajiyar Zuciya ta sauke sannan ta kalle ni jiki sanyaye tace.